Khwahish

Aaj kai arson ke baad dil mein,
Kuch likhne ki khwahish jaagi hai

Armanon aur khayalon ko kisi ko batane ki,
Kisiko sunane ki khwahish jaagi hai

Kaagaz ke pannon ko aaraa kar,
Syaahi se rangne ki khwahish jaagi hai

In lamhon ko isi bahane in pannon mein
Kaid karne ki khwahish jaagi hai

Sard hawaon ko ruk ruk ke phir,
Behne ki khwahish jaagi hai

Behti lehron ko ek baar phir
Kinaare se milne ki khwahish jaagi hai

Taaron ki mehfil mein baithe us channd ko,
Apni chaandni ki khwahish jaagi hai

Baadlon ko apne aanchal ke aagosh mein
Chaand ko chupane ki khwahish jaagi hai

Diye ko apne aap ko fanaa kar
Roshni ki khwahish jaagi hai

Mit jaane ki tamanna dil mein liye,
Phir se jeene ki khwahish jaagi hai

Apne khuda ko yaad kar aaj tumhe,
Dua mein mangne ki khwahish jaagi hai

Kyonki palkon ko band kiye yaadon ke beech
Aaj ek baar phir mujhe.. tumhari khwahish jaagi hai …